قاسىم-جومارت توقاەۆ امەريكا قۇراما شتاتتارىنىڭ قازاقستانداعى توتەنشە جانە وكىلەتتى ەلشىسى ۋيليام موزەردەن سەنىم گراموتاسىن قابىلدادى.
سەنىم گراموتاسىن قابىلداۋ ءراسىمى بارىسىندا مەملەكەت باسشىسى قاسىم-جومارت توقاەۆ امەريكا قۇراما شتاتتارىنىڭ قازاقستانداعى توتەنشە جانە وكىلەتتى ەلشىسى ۋيليام موزەردى ەلىمىزدەگى ديپلوماتيالىق قىزمەتىنىڭ رەسمي تۇردە باستالۋىمەن قۇتتىقتادى. سونداي-اق, ەكى جاقتى قارىم-قاتىناستاردى نىعايتۋ ءۇشىن وسى وقيعانىڭ ماڭىزدى ەكەنىن ايتتى.
– ءبىز قازاقستان مەن امەريكا اراسىنداعى قارىم-قاتىناستاردىڭ قازىرگى دەڭگەيىن جوعارى باعالايمىز. مەملەكەتتىڭ جاڭا باسشىسى رەتىندە ماعان بىلدىرگەن جىلى لەبىزى ءۇشىن اقش پرەزيدەنتى دونالد ترامپقا ريزاشىلىعىمدى ايتقىم كەلەدى, – دەدى قاسىم-جومارت توقاەۆ.
ۋيليام موزەر مەملەكەت باسشىسىنا العىس ءبىلدىرىپ, قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ بىلتىر امەريكا قۇراما شتاتتارىنا جاساعان ساپارى اياسىنداعى ەكى جاقتى ىنتىماقتاستىقتىڭ پەرسپەكتيۆالارىن ەرەكشە اتاپ ءوتتى.
كەزدەسۋ سوڭىندا قاسىم-جومارت توقاەۆ ۋيليام موزەردى قازاقستانداعى ديپلوماتيالىق ميسسياسىنىڭ باستالۋىمەن تاعى دا قۇتتىقتاپ, ونىڭ جۇمىسى ەلدەرىمىز اراسىنداعى دوستىق پەن ءوزارا سەنىمدى ودان ءارى نىعايتۋعا سەپتىگىن تيگىزەتىنىن ايتتى.